Il-proċess ta’ evalwazzjoni għall-kuntratt dwar Integrated Health Information System (IHIS) fl-Isptar Mater Dei kien sospiż wara li membru tal-kumitat ta’ l-evalwazzjoni kien issuspettat li għadda informazzjoni kunfidenzjali lil xi kandidati mingħajr awtorizzazzjoni.

Il-membru kkonċernat, li huwa konsulent tekniku fil-proċess ta’ l-evalwazzjoni kif ukoll membru tal-Malta Information Technology and Training Services (MITTS) bhalissa qed jgħin il-pulizija f-investigazzjonijiet dwar il-każ.

Il-Ministeru ta’ l-Investiment, Industrija u Teknoloġija ta’ l-Informazzjoni ngħata r-responsabbiltà jmexxi ‘l-kumitat ta’ evalwazzjoni teknika ta’ din is-sejħa. Il-proċess ta’ evalwazzjoni jinsab fl-aħħar fażi tiegħu. Dan il-kumitat kien kompost ukoll minn uffiċjali tal-kumpanija MITTS Ltd kif ukoll minn uffiċjali tal-Ministeru tas-Saħħa, l-Anzjani u l-Kura fil-Kommunità u l-Isptar Mater Dei.

Ix-xahar li għadda, iċ-Chairman tal-kumitat esprima s-suspett tiegħu mal-Ministru Austin Gatt li informazzjoni ta’ natura kunfidenzjali setgħet ġiet kommunikata lill-offerenti fil-proċess tas-sejħa għall-offerti mingħajr awtorizzazzjoni.

Il-Ministru Gatt informa b’dan lill-Prim Ministru li qabel li l-Ministru jitlob lill-Kummissarju tal-Pulizija jinvestiga dan is-suspett.

Biex ma jiġux preġudikati l-investigazzjonijiet tal-Pulizija, il-Ministeru ser jitlob lill-Bord t’Evalwazzjoni biex jissospendi l-attivitajiet tiegħu sakemm jingħata avviż ieħor.

Read this article in English:
Tender evaluation halted for Police investigation - Jan 17, 2007 - 9:22:30 AM