Aħbarijiet bil-Malti
Jinstabu kważi 29,000 pillola ecstasy fil-Qawra
By MaltaMedia News
Apr 25, 2007 - 2:22:45 PM

Il-Pulizija għamlet sejba ta’ 29,000 pillola ecstasy f’appartament fil-Qawra nhar it-Tlieta wara nofs in-nhar. Huwa mifhum li din is-sejba hija l-akbar sejba ta’ ecstasy li qatt sehhet f’Malta.  

Raġel ta’ 32 sena mill-Mosta u tfajla ta’ 18 sena mir-Rabat kienu arrestati b’rabta mal-każ.  

Fi stqarrija nhar l-Erbgħa, il-Pulizija qalet li s-sejba seħħet wara investigazjonijiet intensivi li kienet qed tagħmel dawn l-aħħar gimgħat.  B’riżultat ta’ dawn l-investigazjonijiet kien stabilit li kwantita’ kbira ta’ pilloli ecstasy li kienet għandha kemm waslet Malta kienet qed tinżamm ġo appartament fil-Qawra.  Il-Pulizija għamlet tfitxxija ġo l-appartement fejn instabu ftit anqas minn 29,000 pillola tal-ecstasy.  Dawn il-pilloli kienu ippakjatti f’boroz tal-plastik u kienu lesti sabiex jiġu traffikati.    

Il-Maġistrat ta’ l-Għassa Consuelo Scerri Hererra kienet infurmata u ħatret diversi esperti sabiex jgħinu fl-inkjesta.  L-investigazzjoniet mill-Pulizija għadhom sejrin.  Mhux eskluż li fil-ġranet li ġejjin jitressqu xi persuni l-Qorti.

Read this article in English:
Just under 29,000 ecstasy pills seized in Qawra - Apr 25, 2007 - 2:02:34 PM